گوادرے شپ و روچ (1)
نہ ماہی گیر شد لاپ بیتگ نہ ساربان
گْوادرے شپ روچ چوں گْوَستگ انت۔
اے کسہ نہ انت و نہ کہ تامورے اے ھما راستی انت کہ وھد گوزان بیتگ انت بلے مروچی ہم چمانی دیم ءَ گشے تامورے گندگ ءَ کیت۔
مبارک ہوٹل چہ مہلوک ءَ پرُات سارتیں شپءِ عشائے نمازءَ پد مغل کسہ گو وتی کساہاں مہلوکءَ وش نود کنگءَ ات۔کسہ ھلاس بیت بلے مہلوک انگت گشے تنیک ات انت۔
مغل ءَ جار پرینت باندا شپ ءَ دگہ نوکیں کسہءِ کاراں کہ جاتیگ ءِ ساہ من مٹوءِ تہا ات آ پنجروءَ بند ات گڈا ھما عاشق ءَ پہ وتی ماہلنج ءِ واستہ کوہ ءِ کاف ءَ چوں شت ہما گلاب ءِ پل ءِ پہ نادرئیں ءُ ناجوڑے شر رنگیں ماہ جبین ءِ واستہ جنچو ازابی کاٹیت آورتے ءُ ۔ کوہ کاف ءَ ہما مٹو ءِ چہ پنجرو ءَ کشیتے ءُ سرگ سست۔
گڈا جاتیگ ہم مرت۔
ھوٹلءِ ہما پٹرومکس بتّیءِ بروژنائی چاریں کنڈاں تالان ات۔ مبارک ھوٹل ءِ چاہ، ملائی، شیر وش ءُ تامدار ایت انت۔ ھوٹل والہءِ جار ہمیش ات کہ کسہ گوشداروک الم چاہ، ملائی یا شیر بیوارت و ہوٹل ءُ کسہ گوے ھق ادا بکنت۔
گْوادرے سلطان ءِ آ زمانگ ءَ گْوادرے شپ روچ انچو گوزگءَ ایت انت۔
گْوادرے کوجہ (آغاخانی) ءُ گور و بکالانی دکان چہ ڈنی مالاں پر ایت انت۔گْوادرے گیشتر کارو روزگا ہمیشاں گون ایت انت۔ بلے انی آئیانی دکان پرشتگ انت۔ شاہی بازار ویران انت سنگ و بنپد و چیزے دیوال انگت مک انت۔ گیشتر گوں زمین ءَ ہوار انت کسے نیست ات کہ اے مڈیاں بہ پہریزیت۔ نی نہ گنگا رام گْوادر ءَ نشت و نہ سوبھراج درہ یک یک ءَ دوبئی کراچی و ہندوستان ءَ شتان انچو گْوادرے مائیگے بیپاری پیارے بھائی و مہدی امریکہ ءَ سر بیتاں نی گورو بکال سندھے جاہ منند است پہ درمانی گْوادری ہندو نگندے۔
Comments
Post a Comment